संशोधन विधेयक फिर्ता हुनुपर्ने माग गर्दै बुटवलमा प्रदर्शन

काठमाडौं, मंसिर १७ – सरकारले संसदमा दर्ता गरेको संविधान संशोधन विधेयक फिर्ता गर्नुपर्ने माग गर्दै ठूला तीन दलका केन्द्रिय नेताको उपस्थितिमा बुटवलमा बिशाल प्रदर्शन भएको छ ।

नेकपा एमालेका उपाध्यक्ष बामदेब गौतमसहित माओवादी केन्द्रका नेता टोपबहादुर रायमाझी र नेपाली कांग्रेसका केन्द्रीय सदस्य चन्द्र भण्डारीले सम्बोधन गरेको सभामा भाग लिन गाउँ गाउँबाट सर्वसाधारणहरु बुटवल आएका थिए ।

नेपाली कांग्रेस र माओवादी केन्द्रको समर्थनमा सरकारले संशोधन विधेयक ल्याएको भए पनि पार्टीकै केन्द्रिय नेता तथा कार्यकर्ता त्यसको विरोधमासडकमा उत्रिएका हुन् । एमालेले भने संशोधन प्रस्तावको विरोधमा सडक र सदनबाट आन्दोलन गर्ने घोषणा यसअघि नै गरिसकेको छ ।

पाँच नम्बर प्रदेशका पहाडका जिल्ला छुटाइएको भन्दै बुटवलसहित, पाल्पा, अर्घाखाँची, गुल्मी, रुकुम र रोल्पामा प्रदर्शन भइरहेको छ । प्रदर्शनका कारण यी जिल्लामा उद्योग, व्यवसाय, शिक्षण संस्था, यातायात सेवा बन्द छन् । बन्दका कारण पूर्व–पश्चिम राजमार्ग तथा उत्तरदक्षिण सिद्धार्थ राजमार्गमा पनि गाडी चलेका छैनन् ।

यस्तै नेकपा एमालेनिकट अनेरास्ववियुले सरकारले व्यवस्थापिका–संसदमा दर्ता गरेको संविधान संशोधनको प्रस्ताव अविलम्ब फिर्ता लिन माग गर्दै बिहान देशभरका सरकारी क्याम्पस अगाडि धर्ना दिएको छ ।

सरकारले संविधान संशोधनका लागि मंगलबार संसद् सचिवालयमा दर्ता गरेको मस्यौदामा प्रदेश नम्बर ५ लाई विभाजन गरी पाल्पा, गुल्मी, अर्घाखाँची, प्यूठान, रोल्पा र रुकुमलाई प्रदेश नम्बर ४ मा राख्न प्रस्ताव गरेपछि त्यसको विरोध भइरहेको छ । सरकारले संसदमा दर्ता गरेको संविधान संशोधन विधेयक फिर्ता गर्नुपर्ने माग गर्दै ठूला तीन दलका केन्द्रिय नेताको उपस्थितिमा बुटवलमा विशाल प्रदर्शन भएको छ ।