भृकुटीमण्डपमा लोकदोहोरीको घम्साघम्सी
हाम्रो अभियान लोक संस्कृतिको संरक्षण, स्रष्टाको सम्मान, नव प्रतिभाको प्रोत्साहन भन्ने नाराका साथ काठमाडौको भृकुटीमण्डपमा अन्तरदोहोरी साँझ स्तरीय राष्ट्रिय दोहोरी गीत प्रतियोगिता भईरहेको छ । राष्ट्रिय लोक तथा दोहोरी गीत प्रतिष्ठानले आयोजना गरेको लोकदोहोरी प्रतियोगितामा देशभरिका विभिन्न दोहोरी साँझबाट ३२ समूहले भाग लिएका छन् । समूह कतर्फ १६ समूह र समूह खतर्फ १६ समूहले प्रतिस्पर्धा गरिरहेका छन् । पहिलो चरणमा दुवै समूहबाट ८/८ वटा समूह छनौट हुनेछन् । त्यसपछि दोस्रो चरणमा हुने प्रतियोगिताबाट दुवै समूहबाट ४/४ समूह छानिनेछन् । छानिएका ४ समूहबिच फेरि प्रतिस्पर्धा गरेपछि दुवै समूहबाट दुई–दुई वटा समूह छानिनेछन् । दुई समूह सेमिफाइनलका लागि भिडेपछि अन्त्यमा दुवै समूहबाट एक/एक वटा समूह फाइनलका लागि छानिनेछन् । फाइनलबाट जुन समूहले बाजी मार्छ त्यही समूहले अन्तरदोहोरी साँझ स्तरीय राष्ट्रिय दोहोरी गीत प्रतियोगिताको रनिङ शिल्ड उचाल्ने राष्ट्रिय लोक तथा दोहोरी गीत प्रतिष्ठानका वरिष्ठ उपाध्यक्ष बद्री पंगेनीले जानकारी दिनुभयो । पछिल्ला समय प्रत्यक्ष बाजागाजासहितको लोकदोहोरी कम हुँदै गइरहेकाले निरन्तरता दिन, टिकट विक्रीबाट संकलित रकमबाट कलाकार कल्याणकारी कोषलाई बढाउन, हराउँदै गएको लोकगीत संगीतको मौलिकतालाई जगेर्ना गर्न र नयाँ प्रतिभालाई प्रोत्साहन गर्न लोकदोहोरी प्रतियोगिताको आयोजना गरेको पंगेनीले बताउनुभयो । प्रतिष्ठानले आयोजना गरेको दोहोरी गीतको यो दोस्रो संस्करण हो ।
पछिल्ला समय लोकदोहोरी गीतहरुमा निखारता र विकृति सँगसँगै भित्रिएको गायक नारायण रायमाझीको तर्क छ । प्रतियोगिताको निर्णायक मण्डलमा समेत रहेका रायमाझी भन्नुहुन्छ ‘रेकर्डिङका सिस्टमहरु उत्कृष्ट भएकाले धेरै गीतहरु माझिएका पनि छन् । यो विकास सँगै विकृतिहरु पनि भित्रिएका छन् ।’ बेला बखत भईरहने दोहोरी गीत प्रतियोगिताले कलाकारहरुलाई खारिन, माझिन र अगाडि बढ्न अवसर प्रदान गर्ने उहाँले बताउनुभयो । ‘बर्षमा एक पटक हुने अन्तरदोहोरी साँझ स्तरीय राष्ट्रिय दोहोरी गीत प्रतियोगिताबाट नयाँ प्रतिभाको पहिचान गर्न सजिलो हुन्छ र सबै भन्दा त सम्बन्धित कलाकारका लागि पनि प्रतिभा प्रस्फुटन गर्ने ठूलो अवसर हो भन्ने लाग्छ ।’ उहाँले भन्नुभयो । प्रतियोगिता यही २८ गतेसम्म चल्नेछ ।
0 comments
तपाइको प्रतिक्रिया दिनुहोस