बालुवा लिन जाँदा बुढीगण्डकीमा डुबेर एकको मृत्यु, २ वेपत्ता
भूकम्पले घर भत्किएपछि नयाँ घर बनाउन नदीमा बालुवा लिन गएका एक जनाको डुबेर ज्यान गएको छ । दुई जना हराएका छन् । भूकम्पले भत्किएको घर बनाउनका लागि वालुवा निकाल्न गएका गोरखा थूमी-९ का बेदबहादुर थापामगरको ज्यान गएको हो । वेदबहादुर नदीमा डुबेपछि उद्दार गर्न गएका दुई जना वेपत्ता भएका हुन् । थुमी गाविसस्थित आर्खेत बजार नजिकै बालुवा निकाल्ने क्रममा मंगलबार बिहान साढे १० बजेतिर उनीहरुलाई नदीले बगाएको हो । नदीले बगाएका वेदबहादुर थापामगरको शव फेला परेको छ । दुई जनाको खोजी भइरहेको प्रहरीले बताएको छ । नदीमा बगेका वेदबहादुरलाई बचाउने क्रममा थुमीकै साइँला भनिने पूर्णबहादुर आले र टिकाबहादुर आले बगेर बेपत्ता भएको इलाका प्रहरी कार्यालय आरुघाटका प्रहरी निरिक्षक रविराज थपलियाले बताउनुभयो । उनीहरु सबैको उमेर १८/१९ वर्ष हाराहारीको रहेको स्थानीय बासिन्दाले बताएको उहाँको भनाई छ । उनीहरु केही दिनयता नदीबाट वालुवा संकलन गरि खच्चडबाट गाउँसम्म ढुवानी गर्दै आएका थिए । स्थानीय बासिन्दाका अनुसार भूकम्पले घर भत्किएपछि पक्की घर बनाउन वेदबहादुर साथीहरु सहित नदिमा गएका थिए ।
0 comments
तपाइको प्रतिक्रिया दिनुहोस