आफन्तले नै कमिसनको लोभमा ठगे
नवलपरासीका अमरनारायण चौधरीलाई दाइ पर्नेले नै विदेश पठाउँछु भन्दै दलालसँग भेट गराए । दलालले भारतको बाटो हुँदै कतार पु र्याए । अस्पतालमा क्लिनरको काम भनेर गएका अमरले त्यहाँ पुगेपछि उँट चराउनु पर्यो । ७५ हजार रुपैयाँ तिरेर गएका अमरले भनेको काम र तलव पाउनु भएन । उहाँलाई पछि आफ्नै देश फर्किन पनि मुस्किल पर्यो। महेशप्रसाद चौधरीले विदेश जान अन्जली म्यानपावरमा पैसा र पासपोर्ट बुझाउनुभयो । तर म्यानपावरले लामो समयसम्म विदेश पठाएन भने पासपोर्ट र पैसापनि फिर्ता गरेको छैन । उहाँलाई पासपोर्ट र सबै खर्च सहित पैसा फिर्ता गर्छु भनेर म्यानपावरले झुलाइरहेको छ । आइतबार नबलपरासीको कावासोतीमा गरेको ‘देश परदेश यात्रा’ अन्तरगतको सार्वजानिक सुनुवाई कार्यक्रममा सहभागिहरुले यस्ता गुनासा गरेका हुन् । वैदेशिक रोजगारीमा पठाउँदा कमीशनको लोभमा आफन्तले नै ठगेको पीडितको गुनासो छ । ठगी गर्ने दलाल र म्यानपावरलाई कारबाहि नहुँने, अवैधानिक दलालको चलखेल र आफन्तकै कारणपनि वैदेशिक रोजगारीमा जाने युवा ठगिएको उनीहरुको गुनासो छ । ठगिएर प्रहरीमा उजुरी दिँदा समेत प्रहरीले कारबाही नगरेको पीडितले गुनासो गरेका छन् । कार्यक्रममा सहभागीको गुनासाको जवाफ दिँदै नवलपरासीका प्रहरी प्रमुख एसपी राजेन्द्र प्रसाद चौधरीले प्रहरीलाई वैदेशिक रोजगारी सम्बन्धी मुद्दा हेर्ने अधिकार नभएकाले कारबाही गर्न समस्या भएको बताउनुभयो । ठगी, मानवबेचबिखन तथा ओसार पसार जस्ता मुद्दामा कारबाही गर्न सकिने भएपनि पीडितसँग प्रमाण नहुँदा अप्ठेरो भएको बताउनु भयो । यसका लागि वैदेशिक रोजगारीमा जाने युवा आफैं सचेत हुन आवश्यक रहेको उहाँको भनाई छ ।
महिला तथा बालबालिका कार्यालयकी प्रमुख उर्वरा लुइंटेलले वैदेशिक रोजगारीका कारण घरेलु हिंसा, पारिवारिक विखण्डन लगायत सामाजिक समस्या बढ्दै गएको बताउनुभयो । कार्यक्रममा सहभागीहरुले वैदेशिक रोजगारीमा देखिएका समस्या कम गर्न विदेश जाने युवा नै सचेत हुनुपर्ने, ठगी गर्ने म्यानपावर र दलाललाई कारबाही हुनु पर्ने र अवैधानिक काम बन्द गराउनुपर्नेमा जोड दिएका छन् । कार्यक्रममा जिल्ला प्रशासन कार्यालय नवलपरासीका प्रशाशकीय अधिकृत ज्योतिराज अर्याल, सहायक जिल्ला शिक्षा अधिकारी तोयानाथ लम्साल, वैदेशिक रोजगारीको क्षेत्रमा कार्यरत संघसंस्था लगायत वैदेशिक रोजगारीबाट फर्किएका र वैदेशिक रोजगारीका क्रममा ठगिएका युवा पनि सहभागी थिए । देश परदेश यात्रा अन्तरगत अर्को सार्वजानिक सुनुवाई मंगलबार धनुषामा हुने छ ।
0 comments
तपाइको प्रतिक्रिया दिनुहोस